用得「從叉叉講起」這題目，就講明內容 (尤其後段) 其實同標題無什關係。
話說由中一至中五，睡眠時間漸減，由每日八小時降至五小時。但無論睡多久，上堂都未能集中精神聽書，總係想睡，要不就魂遊太空。曾經在中五有改善，但為期不長。會考前後數月，每日睡十至十二小時不等，即刻龍精虎猛。中六開學至今，每日睡六至八個鐘，結果每日上堂都補返個幾鐘，衰過睡五個鐘時。環境稍靜，睡意立即侵襲，是故上堂作文、閱讀理解全部白卷。昨睡十二，精神始有起色。
勿問為何測驗考試不會睡著，謎也。
有人話，要睡多久是基因決定的。
Damn it.
由細到大到好怕靜。以前係靜就無法集中，做不到功課，所以小學時我係一路睼電視、一路玩 CS、路做功課的。電視就算不是看，都會照開。現在則是一靜就會睡，以及只是一路聽歌一路做功課加一路上網。或者打多尐機個人會精神尐，不過有閒錢買顯示卡先算。天音：「有錢買 4p 無錢買顯示卡？」答：「所以。」
可能有人會問，睡這麼多，有時間做功課嗎？其實不太夠。但我甚少為做功課、溫書等而放棄休息時間。我可是個十分重視健康的人...實情係到時到候我會自動睡著。除非那是我很有興趣的，電腦為一例。故電腦功課我可做通宵。另一個做通宵的理由...電腦功課計會考分。係，我就係咁現實。做功課做到嗌生嗌死做乜？欠交不就由他了，做落又無興趣。不想欠交？抄囉！
我是否真係好現實？我又覺得不。向來以興趣行頭。如我鍾意學習，但極討厭做功課。以前讀中史，可以成學期一次作業都未交過。學期尾時還是新的一樣，原封不動，可以一手價賣出。當然，視錢財如糞土的我係無賣出的。又如電腦，我可以通宵對住 HTML 研究網誌排版，或用十三個鍾搞一個無線網絡 (其實主要只係搞一張無線網絡卡的驅動)。又好似今日，我寧願幫手翻譯Ubuntu，都不理功課。現實？睼你點睼。如果你認為講興趣講理想不實際的話，那不就不實際了；如果你認為人生就係為快樂的話，恁我就現實到不得了。
「興趣係培養出來」？廢話，有就有無就無，你培養對匯編語言的興趣來睼睼。由有興趣培養到無就有可能，而且大把實例。所謂「培養興趣」，其實只係了解一下個活動，嘗試找出自己有興趣的部份，再衡量一下值得辛苦與否而已。你做的只係搵，不是培養。
因深明這道理，各讀電腦科但對電腦無興趣的同學，歡迎找我。
對於「不交功課不怕被老師責罵嗎？」這問題，對唔住都要講句，我係以此為樂的。首先，我係一個十分踣街註一的人，人叫我做東我就偏要做西，還要決心證明你個方法不夠好。其次，我係一個非常踣街的人，受軟唔受硬，此為第一點之延伸。其三，我係一個異常踣街的人，樂見別人勞氣，尤其對住我。所謂「認真你就輸了」，踣街仔者，既反叛又無釐正經且自以為是，對其勞氣只係戅居之行。罵我而無理者，食定花生；說教而有理者，洗耳恭聽。奈何後者幾近絕種，買花生買到破産也。
註一：「踣街」者，「仆街死」也。毒咒。不觸及性，故非粗口。想以言入罪者請過主。
